原文
|
2-04 Н’ирэк’ н’ээккэт
|
Гатваленат ынпыначгын гэнпыӈэвэ.
ӈирэнӈээккэльыт.
ӈээккэт ытлыгэ ивнинэт:
― А’тав-ым, ӈээккэтури, ӄыӄоральатгытык.
Имтилӄытгъэт ӈирэргэри чакэттомгыт.
Ытля гэтлыгэ пэлятгъат.
ӈэлвыл улвэквъи.
Ынпычьын чакэттомгын люур иквъи:
― А’мын вай, мэӈин тылеркын ӈаанкэн, а’тав-ым мынувиркын.
Чакэттомгыт увэмгогъат.
Ынпычьын иквъи:
― Гымнан виин пойгын мымнэркын, ымы-ым гыт етъаӈ ӄытвар- кын, мэӈин мэвын пыкирыркын, вэчьым э’ӄэльын.
Янор-ым мынынӄамэтвавын, ыныкит рэрэтэйкэвӈыгъэ ӄылявыл, ы’ттъыёл гымнан мыпэнрыгъан, наӄам малнымлыӄэн.
ӈинчьэн татлыӈыткогъэ:
― Эплеэн, а’тав миӈкэмил мытрэнтыӈын.
Пыкиргъи ӄылявыл.
Никвъэн:
― А’мын ети!
― И-ии.
Ивнин:
― А’м вынэ ӄыӄамэтвагэ.
ӄэйӈунэвын а’тав етыльигыт.
ӄылявыл татлыӈыткогъэ:
― И-ии.
Люур ынӄо етыльын иквъи:
― А’тав мынымгомык.
Ынпычьын чакэттомгын эймэквъи.
Пойгын гэтэӈымнэлин.
Пойгыльатыӈӈогъат.
ӄырымэвын лыгэн лёӈылва нинэнтыӄинӄылявыля ӈэвысӄэт.
ӄынвэр-ым ивнин:
― Опопы виин ратан.
Пойгытывэтляквъэ ӈэвысӄэт.
―Эплеэн а’тав гымраӄ, – иквъи ӈинчьэн чакэттомгын.
ӄылявыл вэтгыры вагъэ:
― И-ии, а’тав-ым.
Ынан люӈэлкыле рыннинэт.
Нычимгъуӄин:
“Этъым ӄылявылтэ”.
ӈинчьэтэ рыпойгыльавыӈӈонэн ӄынур чакэттомга ӄылявыл.
Ныпой- гыльатӄэнат.
ӄырымэвын лыгэн лёӈылава нинэнтыӄин ӄылявыля ӈэвысӄэт.
ӄынвэр ивнин:
― Опопы аны гым малчамъам.
Нивӄин ӈинчьэн:
― Аны ӄэйвэ ӄээӄын.
Ымъылён пойгыльатгъат, наӄам ӈэлвыл нытлытваӄэн.
Нивӄин ӄылявыл:
― Вынэ гым э’тки мэлӄырымэвын.
Нымэтивэтӄин ӄылявыл:
― Вынэ ӄырымэнаторэ ӈэвысӄэттури, ынӄэн ӄылявылторэ.
Гарапааӈыӈӈолен пойгыльатык.
Ынкъам ӄынвэр иквъи:
― Гым энмэч ратан.
ӈэнчьачакэтта ивнин:
― Аны итык лыгимэтивэтык, аныӄун миръытвыгъэк.
Панэна ӄылявыл нымэтивэтӄин.
Нинивӄин ӈэвысӄэтэ:
― Аныӄун-ым ымыӈ кыттэлти ӄыльугынэт, ивкэӄун-ым мытэ- ӈэвиръытвыгъэк.
Эвиръытвыгъи ӈэвысӄэт.
ӄылявыл иквъи:
― О какко, а’мын опопы гынан ӄылявылё ӄинэлгыги, вай-ым миӈкы ӄырымэвын, тырэргыпаты аӈӄачормык.
― А’мын-ым и-ии, – иквъи ӈэвысӄэт.
Ынӄэн-ым тавматэвыӈӈогъэ ӄылявыл.
ӄынвэр лымаляквъэ:
― Эвыӈан ӄэглынангэт ӈэвысӄэтигыт.
Ынпычьэ чакэттомга ивнинэт:
― ӈаанкы мургинэт ытлыгыт.
ӄыйъогыткы.
Авэръэпыгъат.
Чиниткин пойгын ӄылявыля йылнин ӈавысӄатэт ынан-ым пууръу пиринин ӈэвысӄэт – ынӈин пойгынрымэгъат.
Инӄун гатаӈылвыплытколен, лыгэн ӄынвэр ӄылявыл гивлин:
― Опопы этъопэл ӈирэмури мыннымытваӈӈо, наӄам гым гынныкагты ӈыркылеты тынъэлык.