原文
|
2-05 Памъянле
|
Нымнымык ӄол итгъэт ӄоратыъмӈэквъат.
ӄорарэрма ёо’ръочгатгъэ.
Наӄам ымыӈ амъянра гаӄораквотатленат.
Рагтын амынан ӈайыӈӄачагты гэквэтлин.
ӄутти нымнымыӈӄачагты гамӈычгэчеленат.
Ёо’ръок Рагтын нывилгъи кыргысӄымаёлгыткынык.
ӄораквотгъэ, ынӄо милгынпыгъи ы’лыргычыку.
Чаёплыткок ы’лыргычыку нарыч- гытваӄэн, нымалмальатчаӄэн.
Ынӈин оратвагъэ.
Люур ӄынур ярарвыргыргын валёмнэн рыровкы.
ӄээӄын таӈпалёмтэлгъэ.
Эмӄэлелвынэ иквъи:
― А’м, ӄэйвэ эвын ярарвыргыгыргын.
Ытръэч мэнӄо?
ӄээӄын палёмтэлгъэ.
Чымче нъэлгъи выргыргын.
Тантылячым- чаӈ пэтле нынъэлӄин.
ӄынвэр эвыр ынык камлелы вырыргыӈӈонъэ, наӄам нылгинывыргыргыӄин.
ӄытчирэк палёмтэлык ёо’чыко, наӄам ымыӈ таӈъэнрыягнавкы, а’тав чит мынга рырултэннин выргыргын ынкъам нэмэ арычатгъэ.
Люур валёмнэн кэлы вэтгавыльын.
Кэлъэтэ нинивӄин:
―ӄинэйылги ярар гымнин, игыр ӈан пиригъэн гынан, авынвыргыргавма гымнан.
Игыр ынан тырапаагъа чымче ильуткук.
Рагтын иквъи:
―Кыеӈ-ым уйӈэ гымык ярар.
Ръаярар тъынры?
Рэӄу-ым ёо’мачыӈ ильуткуркын?
Пытӄыёо’тватыльатыркын, ӄорарэрынвык!
Энмэч вай тырэмчеткуйвыӈын гынин ярар-ёо’тватэнаӈ!
(Ынӈэ этлы ымыӈ ныльунин ярар.)
―Ынӈэ эмчеткукэ, ӄинэйылги ярар.
Ынкъам ӄорат гынин ӄырэтъёт ӄыльугынэт.
Памъялгын тырэйылгыт.
Эченур ӄынлиркын гэтаӈӈок, – иквъи рытэргычгав кэлы.
Рагтын эмӄэлелвынэ янор иквъи:
― ӄэйӈун ы’ръунтэтыркын… ӄоныры-ым китъам ӄун эплеэн.
Ынӄо кэлы ивнин:
―Китаӄун-ым янор гымык ӄынкалыроквын, чама кынмал мынгитэн ынкъам мынльугъэн ӄорамкын, ынкы вытку тырэйылгыт гынин ярар.
Люур кэльэтэ памъялгын рылегты вальын рэймэвнин ыныкы ынкъам ивнин:
―Аныӄун-ым ӄыгитэгын гынин ӄорамкын ынӈинӈэйык варкын.
ӄэйвэ ӈанӄо лыгэпылматыркын, пууръу ӈэнри тэгмэлмэлетыр- кын, наӄам ымыӈ ӄорамкын ымьылчаакай.
Рагтына гитэнин памъячыкон кэльин.
Эмэӈъэлиничгытэ рыпэт гэлӄутысӄычетлин рамынноӈэты.
Ынӄо ярар йылнин этынвэты, ытръэч пынлёнэн:
― Игыр вай таӈакватыӈ тынъэлык эты?
― Ии, аръаля эмгынин тылян рэмэлмэлетыркын.
Кылгатымгогъэ Рагтын.
ӄонпыӈ памъялгын нинэнрыӄин.
Эвын йыӄэтык ӈалгылегты нытлепыткуӄэн.
Лымынкыри нылгэпылмат- ӄэн.
Эмынин ръэт нылгэтаӈӄэргатӄэн ӄэйвэ эвын.
ӄорамкык пыкирык рылининэт ынӄэнат, ынӄо ӄорат выяннэнат.
Нэмэ чаёгъэ, чаёплыткок агтаннэн ӄорамкын яранӄачагты.
ӄонпыӈ лыгэн ынин ръэт нымэлмэлетӄин.
Мэлетык ӄутти ӄылявылтэ пыкиргъэт.
Эвын ӄорамкын ярак.
Пыӈылтэлгъэ Рагтын ӄылявылтомгэты.
Тывнэн ынин льовылгыгыр- гын кэльэк рээн.
Ынкатагнэпы Памъянлено налгыӈӈогъан.
Аны ымыӈ гакантыляма ныпчегтываӄэн, ыныкит рэмкын ныӄорарэрӄэн.
Ытръэч.