原文
2-06 Эӈэӈыльыт гайъэлга
|
Нынымытваӄэнат ыннэн нымнымык йъэлгытомгыт.
Ынпычьын ӄаантано итыльын ы’ттъыётральо нитӄин.
ӈинчьэн-ым Йильын ынык рачымчо.
ӄол рыннин ӈэргэрык ӄаантана Йильын ивнин:
― ӄита ӄун мынаӈаӈрачвыченмык.
Мэӈин ипэ эплеэн армаӈ вальын?
― Ээ, – ӄутынэ татлыгнэн.
Ынӈин лыгэн нымэльэв нынымытваӄэнат.
ӄонпыӈ нытэӈычьэт- ӄинэт.
Рытгэватлыӄэва ӄолерыёрагтэпы Йильын люур пылӄэтгъи, наӄам ымыӈ нытэвыӄэн, ытръэч нылгитэвмэтэвӄин гытгылӄатык.
ӄолё нылгиӄувчимгъуӄин тэвыльанма, чама лыгэн нивӄин:
― Алымы а’мын лыгикыргысӄыльын тылян.
Эвыӈан тытымӈэ- вык?
ӄолё лыгиръэмиӈкэтэ?
Тантыляӄэвъяӈӈота гитлин альэӄатыльатык, наӄам’ ымыӈ нылгинымэйыӈӄин гытгын.
ӄынвэр гытгычормын йъоӈӈонэн.
Эчги рыйинин нутэсӄын, люур таӈкыргысӄыткынык нъэлгъи.
Гитэнин игыркин ынин альэӄатын:
ӄытлыги ӄырымэн гытгын.
ӄытлыги ытръэч ӄорэн а’чан, ӄораттыт.
Алымы аръаля чемысӄыльын, таӈъаӄапылӄатыӈ вальын.
Ытлён альэӄатыльатгъэ амгынотъылёргытагнэты.
Алымы еп тэркэнэнэма рагтакватгъэ.
Эмӄэлелвынэ ытръэч иквъи:
― Ытлён вай ӄаӈан тырэӄыркын, ымыӈ ӄораттык тыпылӄаты- ӈоркын?
Ынӄо вытку ярак пыкирык, ӄамэтвама ӈэвъэнэ пынлёк:
― Нырэӄигыт о’тчой, алымы ӄаанты этиркининикэ эквэтгъи?
Ынкы вытку кэтъонэн ыргин гайъэлга вэтгав.
ӈотӄо нэмэ рытгэватлыӄэва, татлыгнэн ӄаанты.
Эвын ы’летык ӄаанты нырагтытыляӄэн, рыюлъэ йъоплыткок.
Эвырыльывэнвыеквэ нылеӄин ярак пыкэрыӈоӄ.
Люур таӈамэчатгъат ярат.
Камлелы лылепыткугъи.
Аръаля лыгэонмычыко нытвэтчатваӄэн.
Мэнӄо таӈъаӄаттатыӈ.
Таӈымъ- ылёӈэт, ынкэчыку кивыплыткук, рэттэтвириӈгъи, вытку волӄытвэма тыттэтгъи.
Тыттэтык рытаалгылявнэн чит энмычыкон, ӄытлыги ӄоравэнвычыко гэткивлин.
Ынӄо ытръэч иквъи:
— Ако, эвыӈан Йильын нэмыӄэй мэчынкы.
Элымӈэ ӈан.
Китъам ӄун эплеэн ӈотӄо миӈкыри ритгъэ?
Ынӈин итыплыткук ӄээӄын ынӈин нымэльэв вагъат.
ӄол итгъи инэнвинэвыльын рагтыгъэ эвын вулӄытвик.
Рэсӄиквъи ярак.
Пэнъёлгын нынлетӄин, ывикук нынпытваӄэн.
Ытръэч ӈэвъэн ванэван нивын “етти”, ымыӈ люӈгитэтэ рэсӄивыльын ы’вэӄуч.
Ръэрэӄык кургъи?
Ынӈин лыгэн пэнъёлгыттогты вальатыркын.
ӄынвэр янот э’йӈэвнин.
Лёӈочыткота итгъи.
Ынӄо рэймэвнин, тэӈгитэнин, палёмтэлнэн выегыргын.
Этлы киткит нывъентон.
Гэлгичеӈыттэтлин.
Э’йӈэвнинэт энаральыт.
Нанрочавын, ынӄо намайынлян, нэнпэтын.
Эргатык вулӄытвик нывиӄин, люур валёмнэн гэкэӈвыргыргын.
ӈытогъэ.
Ивнин “етти” гэкэӈыльын.
Люур элкылнин ӄулиӄул, эмӄэлелвынэ нивӄин:
— Алымы мытынпэтын.
Ымыӈ эвиръыт мытычвиткунэт, нэлгыт мытынрагтатынат.
Янор-ым гэлгичеӈыттэтлин, льулӄыл ы’льылю гэнъэтлин.
Чама нивӄни:
— Юрэӄ рэты тыльугъэн?
Ынӈин ытлён вэтчатвама ӄаантана кылгынпэнрынэн пыкитльэн.
Ынӄо кынмал рэсӄиквъэт ярак.
Йильын панэна нытвэтчатваӄэн ӈаргын, инэӈэк олеты, вытку ӈэвъэнэ а’йӈавынво витыткусӄычетгъи, ынӄо рэсӄиквъи.
Рылык ӈэвъэн иквъи:
— Э’тки торарамкыльытвагъа нымнымык, ытльак.
Ы’вэӄучитэ рымӈылявнэн, миӈкыри гитлин.
Атчьатык чимгъутэ ӄаанты нъэйӈэльэтӄин.
Эргатык инъэ амэвычаӈэръа ӈытогъэ ярайпы, э’чесӄиквъи.
Э’чеплыткук чит рэсӄивыркын, ытръэч гэлгийӈэръулин, ымыӈ чиниткин егыт этлы ныльунинэт.
Ымыӈ инэӈ чымче вальын тэгилиӈэ льук нэналвавӄэн.
ӄынвэр галгэӄэвъяӈӈолен, наӄам ымыӈ ампамъяльын, галгэгтыквыӈӈолен.
ӄынвэр эвыр ӄэргаквъэ.
Пэнинэмил яраӈы чымче, ымыӈ ампамъяльын, галгэгтыквыӈӈолен.
ӄытлыги чинитыттэ гантымӈэватлен.
Йъонэн йъэлгытомгын, ивнин:
— А’м вынэ мэчынкы.
Мынпаамык игыр ынӈин итык.
Ытръэч.
---
---