原文
|
2-11 А’ӄаннаӄай
|
Энмэн, ӈаргыночьа гатльанмылен А’ӄаннаӄай, энмэн ынӄэн кытэпалгыӄай.
А’ӄаннаӄай-ейвэлӄэй ытльак тымъёк пэнин лёольын.
ӄынвэр эӈъэле ытльак тымъёк ӄачайпы авээгэчеткоӈӈогъэ.
ӄэлёӄ-ым ытльаӄаен лёльоӄагтэ ӄынвэр гакыкватленат – гъэгчачаленат.
Вэнлыги-ым эмӄынэвииплыткук ытльаӄайык ӄачайпы ӄонпы нылёолӄэвӄэн ыммамаӄайына.
ӈаргыночьа ӄонпы нэнаёпатӄэн, нинивӄин:
― Титэ ытлён транмыгыт, трэнугыт?
А’ӄаннаӄай нытатлыӈыткоӄэн:
― Вынэ янор мыпытӈирэӄэвык.
ӈаргыночьын иквъи:
― Э-э.
Нэмэ виин эквэтгъи ӈаргыночьын яврэнтагнэты.
ӄытлыги А’ӄаннаӄай нылгивинвилюльэтыльэтӄин – нырамчыт- вэӈӄэн.
ӄынвэр эвыр аатгыттэ пэӈкоӈӈонэнат, лыгэн-ым мычытвэӄаат- гъэ.
А’ӄаннаӄай яйвалӈытогъэ – увикипчыткугъи.
Нэмэ яврэна йъонэн ӈаргыночьа.
Ивнин:
― Ытлён титэ трэнугыт, транмыгыт?
А’ӄаннаӄайына ивнин ӈаргыночьын:
― Вынэ ынанкэн тэӈынъэӄэлтэвэ янор ӄинэнтыги.
Ынкъам ынӄэн А’ӄаннаӄай ытри ӈаргыночьын рачвыӈгъат.
А’ӄаннаӄай янотгъэ.
ӄэлюӄ-ым миӈкы А’ӄаннаӄайына ымыӈ майӈаатгыртэ гъысӄагтыӈӈоленат, гапэӈкоӈӈоленат.
ӈаргыноч- ьын-ым аатгырык ы’сӄагтатэты люур гыткамлягъэ.
Торэналвата А’ӄаннаӄай аатгырык рочгэпы типъэйӈэгъи ыӈот:
― Ыммэмэтчин лёльоӄагтэ нытаӈъэгчачаӄэнат.
(Ыммэмэтчин – ынӄэн иӈӄун ыммэмэргин).
ӄынур ытлён ейвэлӄэй кыкватлёльоӄайык галёолен, эмӄынэвии-гиплыткук ытльак ӄачайпы раройвавӈыма.
Турынъэӄэлтэвык ӈаргыночьын гэгэргэтлин.
Гивлин ынӈот ӈаргыночьын:
― И-и, вынэ таӈымыльо тумгыт тыръэйӈэвӈынэт.
Ынкъам лыгэтаӈымыльо гынникыт э’йӈэвнинэт, румэкэвнинэт ӈаргыночьа, гапэпэӄылгыма.
Люур, эчги танӈымыльо умэкэтгъэт-ым, ӄол иквъи:
― Колё а’ымн ӄол ынкэмич мэлныппылюӄин!
Люур пипиӄылгыӄэй, виин лымгытвыма, иквъи:
― Ако лымӈэ эвыр-ым нотаяачьыно ритыркын.
Наӄам ытлён, пипиӄылгыӄэй, рыравтычгыльыӄай, лымгывты- чгыльыӄай.
ӄэлюӄ-ым ытлён ныгыттэпӄинэӄэй гэчичевлин, мэӈин ынаныппылёчьо нарылгыркын.
Ынкъам йыӄӄэй ынӈин гивлин пипиӄылгыӄэй.
Рачвыӈгъат таӈымыльо гынникыт ромакавъёттэ ӈаргыночьа.
Нэльулгэтын А’ӄаннаӄай.
А’ӄаннаӄайына чымчыгъэ мэлёталгы- ӄай.
Ынкъам ӈэнку э’ӄэлылеквъи мэлёталгыӄай талваӈоткатагнэ- ты.
Наӄам гайъэлга ынӄэн ытри кытэпалгыӄай-А’ӄаннаӄай.
Мэлёталгыӄай чит ӈайыткынык вальын, кытэпалгыӄай-ым пууръу вээмык ӄачакэно.
Милютӄэе ивнин А’ӄаннаӄай:
― Этъопэл гыт ӈайыткынык нъынъэлын ӄонпы, йъарат наранваӈэвыркынэгыт ӄонпы, ӄынвэр нэрэткунтык.
А’ӄаннаӄайына ивнин мэлёталгын:
― Ытръэч-ым ӄырымэвын, э’ӄэегыльигым.
Милютӄэе ивнин:
― Вынэ мэчынкы, ынан рэкэквъэ.
Ынкъам ынкатагнэпы кытэпат ӄонпы ӈэйык нъэлгъэт ынкъам пууръу милютэт вээмык нъэлгъэт талваӈоткатагнэты.
Ынкъам ынӄэн амъаӄаорарачвыӈа ынкатагнэпы тэнлымынкы тараӈгъат гынникыт.
Киткит пирӄыльыт лыгэн ынкы пэрӄынвык нытараӈӄэнат:
кэйӈыт, ӄэпэрти, ӈаргыночьыт, риӄукэт, вытэт, пипиӄылгыт, йильэт – лыгэн-ым таӈымыльо.
Ытръэч.