原文
|
2-12 Валвийӈын ынкъам и’ны
|
Вай ӈотӄэн лымӈыл ынӈин вальын.
И’ны амынан ныӄаарэрӄэн.
Люур валвийӈын льунин чымче риӈэмъетыльын.
Ивнин:
― Китаӄун кынмал мынӄаарэрмык.
Гыт-ым ӄыриӈэмъетыркын.
ӄинивыркын, миӈкы ӄаат.
Валвийӈын-ым лыгэн татлыӈыткогъэ:
― Эвыр!
Мынӄаарэрмык.
Ытръэч гым трэлылюркын, гынан-ым ымыльэты аймак.
ӄол-ым:
― И-и!
Ынӈин-ым лыгэн итгъэт:
Валвийӈын ы’ттъыёчаӈӄач риӈэгъи, И’ны-ым яалеӈӄач ныръилемъетӄин.
Валвийӈа льунин ӄаамкын.
ӄолентогъэ:
― ӄаат!
ӈэлвыл найъогъан.
И’гэ льунинэт о’равэтльат.
Пэлӄынтэтгъи раӄаанманӈык, миӈкри ӄун валвийӈа ӄынур ивнинэт о’равэтльат.
Валвийӈа нинэрэвинрэнӈыӄин и’ны ӄаанматык, ынкъам титэ рэӈамъянма нинэльуӄинэт ӄорат, ныӄолентоӄэн:
― ӄаат!
И’ны ныринъэтэнӈыӄин, ытръэч вэнлыги ныпэлятӄэн.
Чит нъивнин:
“Эӄуликэ ӄытваркын!
”Ытръэч йъок валвийӈын нэналвавӄэн ынкъам ынӄэната чама пэнин ӄэлмычьэтыльын ӄаанматык.
Ынан нинэрэлгинкытвылевӈыӄин валвийӈын, рыпэт раелынторкын ръэлямъянма.
Нылгэӈъэлетӄин, рыпэт йилиил ымыльэты нэнагтоӄэн, чама тъымӈычвыно нинэлгыӄин валвий- ӈын.
Ынкатагнэпы панэна кылеркынин валвийӈын.
Йылгыраӄылӄыл кылеркынин, кэмаквыргын ынык ӄаанматык.
Ытръэч.