原文
|
3-15 А’ноквынэн ӈэвъэн ынкъам А’ноквын
|
Тэӈӄугликнымэ, уйӈэ энаальыка, А’ноквын нынымытваӄэн, наӄам эмнуӈкы ытръэч гэӈэвъэнэ. Наӄам ӄонпы А’ноквын ныпэчгарэрӄэн, кымиӈыт амранӄамэтвавӈа. А’ноквынэн-ым ӈэвъэнин нынны Эмгэч. Ӄынвэр, эмуйӈэ вата амноӈгыпы гынникгилик, ӈанӄэн аӈӄачормыгэлегъэ. Аӈӄачормык ынраӄ галгоратвален. А’ноквынэн ӈэвъэн ярак амынан галгоратвален. Ӄынвэрэвыр ӈэвъэн такэрӈыӈӈогъэ. Кымиӈэ пынлёнэн ытльа:
―Ытлён микын кэркэр тэйкыркын ?
Ытльата ивнин:
―Энмэн ытлён гымнин.
Ынӄо Эмгэчынэ кэркэр плыткунин, лыгэнэвыр йымнэн, ынӄор-ым ӈаргыногты ӈытогъэ. Эмгэч вытрынтэтгъи рагролмык ярак, ынраӄ-ым ытлён кэльэну нъэлгъи. Вулӄытвик рэсӄиквъи чоттагнэты, лыгэнэвыр ралкогты рылгъэ. Ивнин ӄол кмиӈын:
―Кита А’ноквынэн нэнэны ӄол мыйӈогъан.
Нэйылгъэн айылга ынанмыӄычьыӄай нэнэны, лыгэнэвыр йылинэӈу рунин. Нэнэны руплыткук эквэтгъи. Нэмэ эргатык вулӄытвик ӄытгъи ярагты, эвын гатчьатленат кымиӈыт ымыльо. Ынӄо рэсӄиквъи. Нэмэ ванлягъэ:
―Китаӄун А’но-о-оквынэн нэнэны мыйӈогъан.
Люнйыле нэнтыгъэн нэнэны. Ытръэч ӈытогты иквъи:
―Ӄырым игыр лымӈэ уйӈэ мытвагъак. Эвын лыгэн эргатык трэетгъэ.
Ӄынвэр ынкэкин ӈавъыттъиӈын чемгъотвагъэ. Ивнинэт:
―Ӄынвэр како а’мын нэткуркынитык, ӈавэтынвыӄагторэ, гымык энанӄамэтвавыльыӄагторэ, наӄам вай А’ноквын э’ми еп эпкиркэ варкын.
Ӈавъыттъиӈа ивнинэт этынвыӄагтэ:
―Опопы миӈкри мынэквэтэвтык, ытръэч наӄам кэтэм ӈирэтури гынутык.
Ӈавъыттъиӈын нилгэтгъэн. Ивнинэт ӈавъыттъиӈа:
―Опопы ынӈэ инилгэткэ, ынан а’тав миӈкри трэнтынтык. Эймэвийгут рыннинэт ӈинӄэгти, ынӄо лыгэнэвыр ымыльо титӄэннинэт.
Эквэтгъи ӈавъыттъиӈын. Ымыльо нанӄычыко рэквэтэвнинэт. Ынӄо ӄулинымык ӈавъыттъиӈын пыкиргъи. Иквъэт нымнымкинэт о’равэтльат:
―Колёмэй миӈкэкин ӈавъыттъиӈын нылеӄин, амнанӄыпыгта рэӄэ рыпэт нанӄъамата нылеӄин.
Ырык ӄача ӈавъыттъиӈын ныкоргавыльатӄэн. Ӄынвэрэвыр нэчичевын, эвыӈӈогъат:
―А’мын вай ипэӄун аны А’ноквыргэн четлёӈавъыттъиӈын.
Ӄол ынпыначгыӄай нивӄин:
―Ӄэйӈун вынэ ӄырым амтымӈэ морыкайпы нылейвыгъэн, наӄам майӈынанӄыльын.
Ӄынвэрэвыр о’равэтльак рыягнавкы гырэлгъи ӈавъыттъиӈын. О’равэтльаӄагтэ пинтыӄэтгъэт, ӄытлыги А’ноквынэн нэнэнэт. Ӄытлыги тэӈуйӈэ ӈавъыттъиӈын ананӄыка нъэлгъи.
Вулӄытвик-ым А’ноквынэн ӈэвъэн амрак пэляёк рэсӄиквъи:
―Кита аны А’ноквынэн нэнэны мыйӈогъан, эвын наӄам-ым ӄырым уйӈэ мытвагъак.
Икутъэче ныӄулильэтӄин, э’ми уйӈэ, очыткокыльэнат. Ӄынвэр амтъымӈычвына очыткока вальэты рылысӄычатгъэ ралкогты. Эвын ынӄэн таӈамӄачгып рэлкун. Ёроӈы рырайвынэн валята. Нивӄин:
―Эви ӄатчытватык, аалёмка ӄытватык, игыт-ым ынӈатал тытаӈымыльоркынэтык.
Уйӈэ ваплыткок колё вэнвэты гэнарэрлен, ытръэч винвыт ӈавъыттъиӈэн льунинэт, ы’лыткыната вальыт, нанӄыкэн ымы а’матръэт льунин.
Ынӄо-ым А’ноквын ярак пыкиргъи. Рэсӄиквъи:
―Э’митлёнаторэ, ӄыгъеквытык. Гэтэкичгырэтигым чама колё гэмытӄырэтигым.
Ытръэч кэльэну нъэлльэн ӈэвъэн коргавыӈӈогъэ:
―Ко-олё, ынӈатал вэлынкыӄунэйгыт, гэтэкичгынӈэйгыт чама гэмытӄынӈэйгыт. Вэлер-ым отчой пыкиргъи.
Ӄынвэр А’ноквын, йимгымгэ, гынтэквъи магляльын. Колё ӈэвъэн гэвэлеркылелин магляльэты. Ӄынвэр магляльын танйъонэн, лыгэнэвыр пыкиринэӈу орвык яалеӈӄач инэнрэтгъи. А’ноквына-ым, орвык инэнрэтыльин, валята ӄол рылгылгын чывинин. Панэна нинэнрэтӄин. Ӄынвэр ымыльо рылгыт чывиткунинэт. Ынраӄ-ым орвык лыгэтымлыйготкогъэ. Орвык ёоткотвальын а’лыгатгамнэн, левыт таӈынэчгэтавнэн, аймак пэлятгъэ, ынӄор-ым въигъи, лымӈэ люӈэютэ итгъи.
А’ноквын эмчимгъутэ нивӄин:
―Како-ым ӈан ӄырым вынэ ымыльо нэнэнэт ныткунинэт, амъатав нывэлеркылегъэн, а’тав мэнарэрык кмэӈэты.
Эквэтгъи А’ноквын. Нымнымык пыкиргъи. Люур кымиӈыӄэгти ӈытогъат, лыгэнэвыр А’ноквына элкылнинэт. Ымыӈ кымиӈэ А’ноквын нэлкылын, накытгынтыпэнрыгъан, амкоргава кымиӈыт тэргатгъат. Ивнинэт А’ноквына кымиӈыт:
―Э’ми ыммэмы ?
Кымиӈэ нивын:
―Э’тки энмэч ӄутти ынан гэнулинэт, йичьэмиттумгыт мургинэт, ытлён кэльэну гэнъэллин.
А’ноквына кымиӈыт ивнинэт:
―Игыт лымӈэ ынӈэ айылгавка, гымнан ытлён ганмылен. Ытръэч.
訳
3-15 А’ноквынэн ӈэвъэн ынкъам А’ноквын
Тэӈӄугликнымэ, уйӈэ энаальыка, А’ноквын нынымытваӄэн, наӄам эмнуӈкы ытръэч гэӈэвъэнэ. Наӄам ӄонпы А’ноквын ныпэчгарэрӄэн, кымиӈыт амранӄамэтвавӈа. А’ноквынэн-ым ӈэвъэнин нынны Эмгэч. Ӄынвэр, эмуйӈэ вата амноӈгыпы гынникгилик, ӈанӄэн аӈӄачормыгэлегъэ. Аӈӄачормык ынраӄ галгоратвален. А’ноквынэн ӈэвъэн ярак амынан галгоратвален. Ӄынвэрэвыр ӈэвъэн такэрӈыӈӈогъэ. Кымиӈэ пынлёнэн ытльа: ―Ытлён микын кэркэр тэйкыркын ?
Ытльата ивнин:
―Энмэн ытлён гымнин.
Ынӄо Эмгэчынэ кэркэр плыткунин, лыгэнэвыр йымнэн, ынӄор-ым ӈаргыногты ӈытогъэ. Эмгэч вытрынтэтгъи рагролмык ярак, ынраӄ-ым ытлён кэльэну нъэлгъи. Вулӄытвик рэсӄиквъи чоттагнэты, лыгэнэвыр ралкогты рылгъэ. Ивнин ӄол кмиӈын:
―Кита А’ноквынэн нэнэны ӄол мыйӈогъан.
Нэйылгъэн айылга ынанмыӄычьыӄай нэнэны, лыгэнэвыр йылинэӈу рунин. Нэнэны руплыткук эквэтгъи. Нэмэ эргатык вулӄытвик ӄытгъи ярагты, эвын гатчьатленат кымиӈыт ымыльо. Ынӄо рэсӄиквъи. Нэмэ ванлягъэ:
―Китаӄун А’но-о-оквынэн нэнэны мыйӈогъан.
Люнйыле нэнтыгъэн нэнэны. Ытръэч ӈытогты иквъи:
―Ӄырым игыр лымӈэ уйӈэ мытвагъак. Эвын лыгэн эргатык трэетгъэ.
Ӄынвэр ынкэкин ӈавъыттъиӈын чемгъотвагъэ. Ивнинэт:
―Ӄынвэр како а’мын нэткуркынитык, ӈавэтынвыӄагторэ, гымык энанӄамэтвавыльыӄагторэ, наӄам вай А’ноквын э’ми еп эпкиркэ варкын.
Ӈавъыттъиӈа ивнинэт этынвыӄагтэ:
―Опопы миӈкри мынэквэтэвтык, ытръэч наӄам кэтэм ӈирэтури гынутык.
Ӈавъыттъиӈын нилгэтгъэн. Ивнинэт ӈавъыттъиӈа:
―Опопы ынӈэ инилгэткэ, ынан а’тав миӈкри трэнтынтык. Эймэвийгут рыннинэт ӈинӄэгти, ынӄо лыгэнэвыр ымыльо титӄэннинэт.
Эквэтгъи ӈавъыттъиӈын. Ымыльо нанӄычыко рэквэтэвнинэт. Ынӄо ӄулинымык ӈавъыттъиӈын пыкиргъи. Иквъэт нымнымкинэт о’равэтльат:
―Колёмэй миӈкэкин ӈавъыттъиӈын нылеӄин, амнанӄыпыгта рэӄэ рыпэт нанӄъамата нылеӄин.
Ырык ӄача ӈавъыттъиӈын ныкоргавыльатӄэн. Ӄынвэрэвыр нэчичевын, эвыӈӈогъат:
―А’мын вай ипэӄун аны А’ноквыргэн четлёӈавъыттъиӈын.
Ӄол ынпыначгыӄай нивӄин:
―Ӄэйӈун вынэ ӄырым амтымӈэ морыкайпы нылейвыгъэн, наӄам майӈынанӄыльын.
Ӄынвэрэвыр о’равэтльак рыягнавкы гырэлгъи ӈавъыттъиӈын. О’равэтльаӄагтэ пинтыӄэтгъэт, ӄытлыги А’ноквынэн нэнэнэт. Ӄытлыги тэӈуйӈэ ӈавъыттъиӈын ананӄыка нъэлгъи.
Вулӄытвик-ым А’ноквынэн ӈэвъэн амрак пэляёк рэсӄиквъи:
―Кита аны А’ноквынэн нэнэны мыйӈогъан, эвын наӄам-ым ӄырым уйӈэ мытвагъак.
Икутъэче ныӄулильэтӄин, э’ми уйӈэ, очыткокыльэнат. Ӄынвэр амтъымӈычвына очыткока вальэты рылысӄычатгъэ ралкогты. Эвын ынӄэн таӈамӄачгып рэлкун. Ёроӈы рырайвынэн валята. Нивӄин:
―Эви ӄатчытватык, аалёмка ӄытватык, игыт-ым ынӈатал тытаӈымыльоркынэтык.
Уйӈэ ваплыткок колё вэнвэты гэнарэрлен, ытръэч винвыт ӈавъыттъиӈэн льунинэт, ы’лыткыната вальыт, нанӄыкэн ымы а’матръэт льунин.
Ынӄо-ым А’ноквын ярак пыкиргъи. Рэсӄиквъи:
―Э’митлёнаторэ, ӄыгъеквытык. Гэтэкичгырэтигым чама колё гэмытӄырэтигым.
Ытръэч кэльэну нъэлльэн ӈэвъэн коргавыӈӈогъэ:
―Ко-олё, ынӈатал вэлынкыӄунэйгыт, гэтэкичгынӈэйгыт чама гэмытӄынӈэйгыт. Вэлер-ым отчой пыкиргъи.
Ӄынвэр А’ноквын, йимгымгэ, гынтэквъи магляльын. Колё ӈэвъэн гэвэлеркылелин магляльэты. Ӄынвэр магляльын танйъонэн, лыгэнэвыр пыкиринэӈу орвык яалеӈӄач инэнрэтгъи. А’ноквына-ым, орвык инэнрэтыльин, валята ӄол рылгылгын чывинин. Панэна нинэнрэтӄин. Ӄынвэр ымыльо рылгыт чывиткунинэт. Ынраӄ-ым орвык лыгэтымлыйготкогъэ. Орвык ёоткотвальын а’лыгатгамнэн, левыт таӈынэчгэтавнэн, аймак пэлятгъэ, ынӄор-ым въигъи, лымӈэ люӈэютэ итгъи.
А’ноквын эмчимгъутэ нивӄин:
―Како-ым ӈан ӄырым вынэ ымыльо нэнэнэт ныткунинэт, амъатав нывэлеркылегъэн, а’тав мэнарэрык кмэӈэты.
Эквэтгъи А’ноквын. Нымнымык пыкиргъи. Люур кымиӈыӄэгти ӈытогъат, лыгэнэвыр А’ноквына элкылнинэт. Ымыӈ кымиӈэ А’ноквын нэлкылын, накытгынтыпэнрыгъан, амкоргава кымиӈыт тэргатгъат. Ивнинэт А’ноквына кымиӈыт:
―Э’ми ыммэмы ?
Кымиӈэ нивын:
―Э’тки энмэч ӄутти ынан гэнулинэт, йичьэмиттумгыт мургинэт, ытлён кэльэну гэнъэллин.
А’ноквына кымиӈыт ивнинэт:
―Игыт лымӈэ ынӈэ айылгавка, гымнан ытлён ганмылен. Ытръэч.