原文
|
2-21 Рэмкыльэтыльын
|
Энмэн вай ынӈот гатвален.
ӄол рэмкыльын нырагтакватӄэн, наӄам-ым ынин яраӈы лыгэчекыяа.
Нылеӄин.
ӄынвэр-ым льунинэт эвлетэлы тылельыт ӄаат.
ӈутку ытлён нанӄамэтвавын, нанчаёвын.
Ынӄоры-ым намӈылён:
― Леӈытаӄ уйӈэ атаӄъакыльэгыт?
ӄутынэ-ым ивнин:
― ӄыгитэ ӈан мургин варкыт ӈыраӄ ӄорат, ӄол ӄынлейвыгын.
Эквэтгъи энмэч вусӄынкиръук.
Люур ы’ттъыёча льунин мэчыӄэр- гын.
ӄлявыл коргаквъэ, эмӄэлелвынэ чимгъугъи:
“А’мын-ым рэӄулым нымным.
Вэлер-ым ӈутри тыетык”.
Пыкиргъи.
Тэкэмыннэн лыгэран ынкы.
Пыкэтльагты ӈытогъат ынпыначгыт ынкъам ӈэвъэнйыръыт.
Иквъэт:
―Рымагтэты ынӈэ энлекэ.
Лыгэн ынкы ӄыпэлягын.
Вай митъэлыги чикинъэ мытраялгыты.
Рэсӄиквъи.
ӈэвъэнйыръын иквъи:
― ӄытлыгэ ралкогты.
ӈэвъэнйыръын ӄэминэймэквъи.
Эръэт ничыӈӄинэт, рыпэт мутлытӄыльут.
ӄэмиплыткунэӈу атчьатгъат.
Рэмкыльын чит кэттываркын.
Ивнин этынва:
― Вынэ ыннэ акэттывака.
Лыгичикинъэ мытраялгыты.
Атчьатгъат.
ӈэвъэнйыръэ чинитпучьэтэ чотаннэн.
Ынӈатал-ым гэӄиилӄэтлин рэмкыльын.
Кыеквъи эвын таӈамынан нутэк, ытръэч гыролмакы ӈаргыночьэн вэнвымкиӈын.
ӄутгъи.
Нэмэ эквэтгъи.
Ярак пыкиргъи, вытку ынкы валёмнэн, миӈкы гэткивлин.
Ынӄэн ӄытлыги и’гэ гэнулинэт ӄаат.
Ынкэӈит ытлён чимгъуй:
― А’мын вай ӄытлыги и’грэмкык гэткивигым.
Ытръэч.