|
Folk tale of Nanay. Najkhin dialect
by Gejker, Niesulta Borisovna
Source
|
|
дэхи морин
|
эз̌и аси з̌уэркээ～н балз̌ихачи, эм боадо.
туи балз̌ии～ туи бии, туи балз̌иидоачи-а～-тании эз̌ини-тэнии
долбо-гдал тоокои долбо-гдал эугуи тами
бэjумбэ бэичии, сиагоjи вааичаини-гоани.
асини-тании туи з̌оогдо биини-гоани эмучкээн пиктэ-дээ анаал-да.
туи бими～ туи балз̌ими эм модан-гола эз̌ини чимии тоокохани.
пуз̌ин-тэнии, тэи удэвэни, з̌оо доовани оосираа силкочигораа
муэӈгуjи боачи наӈгалахандоjи, кукпучуучи наӈгалараа хаихан,
чиэчихэни кукпучууду, туи тараа илигохани.
илигоини эм морин-гола, хаи, эм алха-м морин бичин,
долинз̌иани хамаси, з̌улэси-дэ, гууjэруу морин.
пукчими бичини-э пуз̌имбэ-лэ исииз̌иjи гэсэ ундии, ''эз̌эн пуз̌и～н,''
ундии, ''эз̌эн мэргэн бии-нуу,'' ундии. ''абаа～,'' ундиини-гоани.
''гээ～,'' ундии, ''амимбани ваахан амбаани з̌из̌ухэ～н,'' ундии,
''исиндахани,'' ундии, ''бумбивэ, буэ-тэнии, дэхивэ бичипу,'' ундии,
''эси-тэнии бумбиэ-тэнии ваами сиариини,'' ундии,
''бумбиэ манами, сумбиэ ваандагоз̌ара''-м-да.
''хаоси-да иралбогои мурчиjэ,'' ундии, ''сумбивэ. гусэрэхээри,''
ундиини-гоани, ''эз̌и～ оӈбора,'' ундии, ''тургэн гусэрэхээри-э''-м-дэ.
эси-тэнии пуз̌ин-гулэ эси иигухэ～н, тэи морин туи пээтэрирээ туи пагз̌иалагохан.
эси-тэнии пуз̌ин-тэнии иигухэ～н, ''эси хоони з̌ооӈгоори, ии наи з̌из̌уучиэни.''
пиивэвэ з̌апараа эњуэjи луктурэм наӈгалахани.
муэ jэвэриидуjи хэjэидуэни-лэ з̌ооӈгоз̌аа-ма-м-да.
э～ӈ туи тараа-ла туи бии, сиксэгухэ～н, эз̌ини эугухэн,
сиаорива таори осии-гоани. сиаорива тали, пуjуугуи-лэ,
муэвэ-лэ эњуэчиjи jэвэрихэни, эњуэлэни эси, лур хэjэхэни.
''хоони тахаси,'' ундиини-гоани.
''ииjэ～ эиниэ тэи удэвэни оосичигоидоjи, пиивэвэ тугбухэмби,
тугбухэмби-тэнии,'' ундиини. гээ оӈбохан.
эси-тэнии туи сиахан хаихан пуjуухэн гои эњуэвэ носоогораа-да.
эси-тэнии з̌иа чимаи эз̌ини эриндулэjи тоокои-гоани дуиси.
эси-тэнии пуз̌ин-тэнии ундииси хаиси боачи,
оосигораа боачи наӈгалахандолани хаиси морин з̌из̌ухэн.
''эз̌эн пуз̌ин,'' ундии, ''эз̌эн мэргэн бии-нуу,'' ундии. ''абаа～,''
ундии, ''мии оӈбохамби,'' ундии, ''хасо хасо-да.'' ''энэнэ～,'' ундии,
''хоони ачаини,'' ундиини-гоани, ''хаила-даа эргэмбэси ирагилаиjа,
хоони оӈбоиси,'' ундиини-гоани, ''туи кэкчэхэмбэ.''
''гээ ачаасини-тании-а～,'' ундии, ''з̌илиjи.'' эси-тэнии туи тараа иигухэн,
эси тэи морин-тании туи пээтэрирээ туи пагз̌иалагохан.
тэи хамиалани-тании пуз̌ин-тэнии иигухэ～н, эси мурчии эси,
''хоони таори. эси-тэнии сиагоани бууриидуjи-лэ з̌ооӈгоз̌аа-ма,''
тэи сиариини силиава тул ту～л сиариини силиавани боjарам тахани.
э～ӈ ундииси туи тараа-ла тэи-лэ пуз̌ин-гулэ эси-тэнии ундииси, хаихани,
туи бии～, сиксэ эз̌ини эугухэн эси сиаори, з̌из̌ухэни сиагоjи
буувуривэ гэлэи-гоани. этэ котаамбани з̌апагохан боjака.
эз̌ини, гои котаамба соосираа буухэни, эз̌ини ундиини,
''хоони тахани,'' ундии, ''мии котаамби.'' ''ииjэ,'' ундии,
''эиниэ сиаорива эњуэчи соосигоидоjи, хаихамби,'' ундии,
''тоӈгалахамби,'' ундии, ''боjарам энэиз̌иэни.'' гээ туи осихан.
эси-тэнии туи хаихан апсиӈгохан, сиараа,
гои котаанз̌и сиараа апсиӈгои-гоани. эси з̌иа чимани тээхэн
тоокохан эси-тэнии пуз̌ин-тэнии ундииси э～ӈ хаиси оосигохан хаи,
морин хаиси з̌из̌уи-гоани, боачи ниэриини-дэ.
''эз̌эн пуз̌ин, гусэрэкэси-нуу,'' ундии. ''абаа, хэрэ～ оӈбохамби,'' ундии.
''эрдэӈгэ хаи-даа, ундииси, хоони оӈбовааӈкини... оӈбоиси,''
ундиини-гоани, ''туи-ээ поӈгидоjи амбаан горочи ираори бичин-гоани-а
сумбивэ. э～ӈ нээ гусэрэхээри, эз̌ичиjи эси, буэ з̌оамба осигокапо,''
ундии, ''дэхии наи.'' эси-тэнии ундииси пуз̌ин-гулэ иигухэни ундииси
э～ӈ эси хоони тахан, ''хаива боjалихан-даа хаи jэбэни.
уи даалз̌икосо, эргэмби исиидоjи-ла з̌ооӈгоз̌аа-ма,'' нуктэjи-лэ
эи, туи з̌апараа эиjи чиир чаалихани. пачичаjи.
э～ӈ туи тараа эси-тэнии туи тараа, эз̌ини-лэ сиксэ эугухэ～н.
ичэини-лэ асини-ла, нуктэjи пачичавани эмз̌иjивэ чаалихани бичини.
чиир бичини эи чаалихани. эси-тэнии эз̌ини-тэнии аjакталахани,
''эрдэӈгэ～ ундииси, сии хаоси осихаси-а''-м-да.
''будииз̌иэси-кээ з̌из̌аанахан-ноо, хоони тахан-ноо,'' ундиини.
''тоо эњуэ боjаарии, тоо силиа боjаарии,
эси-тэнии ундииси-дээ хоони дэгдэпсиӈкиси-э,'' ундии,
''нуктэjи чаалихан.''
''эчичими чаалихамби-тании,'' ундии, ''з̌улээ-дэ.''
эси-тэнии ундии асиjи-ла ундииси оонз̌и з̌игдаиз̌иjи гэсэ ундииси,
кучээмби-лэ кормиилаjи татами гидалахан туӈгэндулэни эмургумбэ-дэ.
э～ӈ ундииси асини-ла чадо-ла ундиини, ''анда～ мэргэн,'' ундии,
''эз̌иэнэ～ ундииси, вааӈаси-тании,'' уӈкини.
''мии-дээ хаоси осихамби,'' ундиини, ''хамачаа з̌илидоjа-даа абаа,
элээ будии эр исихамби-тании-а''-м-да. ''эз̌иэнэ～,'' ундии,
''з̌ооӈкочигоjава''-м-да. туи тараа эси-тэнии ундии, эз̌ини-тэнии,
з̌игдахани тээсиини-гоани, кучээлэхэни кучээмби з̌апачами,
эчиэ-дээ татагоа кучээмби. э～ӈ аjакталахани хаоси энэгилэи.
туи тами-а～, ''эз̌иэнэ～, эи хаими туи осиохани～,'' ундии,
''эи бурпугуи туи осиохан-тании''-м тэи-лэ пуз̌ин-гулэ туи
пээтэрими туи хисаӈгоини-гоани, тэи эз̌ини туи тээсиидуэни.
гээ туи тами, ''гээ～,'' ундии, ''эси-кээ будиидуjи эргэндуjи з̌ооӈгоз̌аа-ма,
уӈкимби, тэрэк з̌оонгохамби,'' ундиини-гоани.
''эси илаачии иниэ пулсиини,'' ундии, ''моринси.
дэхивэ бичэпу-э-м пулсихэни,'' ундии, ''наи,
амимбасо ваахамби баигоанси амбаан исиндагохани,
бумбивэ хэм, сиариини''-м, ''эмз̌иэчи ваами
эмз̌иэчи эњуэчиjи наӈгалами пуjуурими сиариини бумбиэ,
мимбиэ манами сумбиэ, сунчи хукчугуjэ-м-дэ,
э～ӈ тэи-тэнии морин-тании ундииси долинз̌иа, хамаси гууjэруу,'' ундии,
''з̌улэси хамаси-да. тэи-тэнии, ундиини,'' ундии,
''амимбасо ваахан амбаан з̌из̌ухэни, бумбивэ туи сиариини ваарии
эси з̌оамба осигокапо пулсихэн,'' ундии, ''эиниэ. туи тараа-тании,
будии эргэндулэjи-дээ, з̌ооӈгоз̌аа-ма-м чаалихамби,'' ундии, ''нуктэjи. хаи,
эси-мээ боjалиачиндоjи, эњуэ-дээ боjалираа котаамба-даа баичираа,''
ундиини. ''эси будии эргэндулэjи з̌ооӈгоз̌аа-ма-м
нуктэjи чаалихамби''-а-м-да. гээ эси-тэнии эз̌ини-лэ ундииси э～ хаихани,
кучээмби татагохан, иноксаз̌и з̌илоксаз̌и мододахан, колполиа хоогохани,
пуjэ-дээ абаа хаи-даа абаа осиогохан, сээрээ осиогохан пуjэни.
э～ӈ эси-тэнии тэи долбо инэдэлэ туи гасамаари тээсии-гоани
туи тараа ундииси, з̌иа чиманиа-ла чэк баараз̌игохан ундииси
эси-тэнии ундииси, баараз̌игораа боачи ниэрии ундииси
эси пирикчии-дэ морин исиндагохан, ''гээ, пэдэ,'' ундии, ''оороосо,'' ундии,
''элээ наи, элээ хасипоалаи-jа,'' ундии, ''бумбиэ.''
э～ӈ эси-тэнии морини-ла тээрииз̌иjи гэсэ ундииси э～
кирим кирим таа ундэ, хуигувэни з̌апахани.
з̌апахани бичин тэи амбааӈгони узче морин хуигудуэни.
тэи-тэнии морин-даа уиси дэгдэивэни хуигувэ-дээ з̌апахамбани
мэргэн-тэнии сиӈасооjи ачоиз̌иjи гэсэ чиир чаалихан, тиэс,
наачи туугухэни. таваӈки-ла морин-гола уиси хор дэгдэиз̌иjи гэсэ
таваӈки туи энэи, туи энэхэ～н, хоони-а-даа энэхэн хоони-а-даа энэхэн,
пэиси～, пэиси туугухэни сээн оничи-да. они даани доокиалани-да.
эси-тэнии ундииси, ''э～ эз̌эн мэргэ～н ундииси, баланаа, боӈгодо-баки,
хаихаси боа-даа, боа наа дуэчиэни ирамчаjа,'' ундиини.
''эси мии маӈбо бодоми хэи з̌ичимби,'' ундиини.
''соли ирапи, тааримса хэилэни баогоиjа,'' ундиини-гоани,
''амбааӈгосо, сумбиэ.'' эси-тэнии ундииси, ''э～ эси будээмби,'' ундии,
''маӈгалахамби,'' ундиини, ''туи тутуми-мања.
мии буикин-дээ эз̌и соӈгоасо,'' ундиини-гоани,
''эвэӈки хоони-даа эрдэнз̌и эргэӈгуjи гэлэндэз̌ээчи-мэ''-м-дэ.
''эи, боа наа доони элээ исихамби,'' ундии,
''эи маӈбова даоми таjа калтааз̌иала, гириа,'' ундии,
''хаи, хурээн-мэ бииjэ,'' ундиини-гоани, ''паакта.
тэи чала тоории осини мутэз̌ээчи, мутээси осини-каа аjа,'' ундии,
''њаӈга эм, хадо-а иниэ-кээ балз̌из̌аачи-а''-м-да.
эӈ туи уми буикин мориӈго-ла ундииси, эси-тэнии
тэи моримба-ла ундииси, моӈгондо з̌апакап наамандаа соӈгохан,
туи тараа ундииси эз̌ини-лэ ундииси, з̌акпадоани-ла хаилоо улээн моо бичини,
хаи, поло. поло-гда-ос, таоси тоохани ундииси, мокчаиз̌иjи гэсэ ундииси,
гиасооз̌иjи-ла харпиӈкини ундииси тэи-лэ ундииси-э,
лиасом эм з̌аи туугухэни. сэктээӈку чэк хаиори,
эси-тэнии тэи, з̌аидо тээрииз̌иjи гэсэ энэиз̌иjи гэсэ сусуичи.
ичэичэи-лэ ӈээриу～ амбаан энээ ундэ, тэи-тэнии њоамбачи, сиур,
хэи энэхэн. энэхэн маӈбо-мањани-гоани таваӈки-ла тэи гурун-тэнии
чакпала ка～с чисамаари дэруухэн наи, ичэвэдээси, хаи jало.
туи энээ ундэ, туи-дээ даории мэргэн-гулэ элэӈгуэ～нчиэни соирами
туи энэини-гоани, тэи-лэ ундииси соирами туи энэи,
ичэини-лэ ундииси ӈээриу～ з̌из̌уэ ундэ, тэи-лэ амбаан-гола,
хуэдэхэн њоамбачи. эси-тэнии тэи мэргэн-тэнии тэиз̌и паакта,
эм хаи-маа, эи з̌оо-маа биини-гоани, гогда.
чала-ла ундииси мэргэн-гулэ хаарииз̌иjи гэсэ, дуиси, уиси тоории-гоани.
''анда～ мэргэн пэдэ, анда мэргэн пэдэ, мии-лэ мутээсимби,'' ундии
тэи, мэргэн-гулэ туи чала мокчами туи тоории-гоани тэи, паактала.
эси-тэнии долимбани пэгиэлэ бии-ос, асивани-ла элээ-лэ,
''анда～ мэргэн будэмби элээ мимбиэ наи сиаз̌аа-ма,''
туи ундии эргэн... з̌илан... з̌илгани-ла лолалала абанахан. элээ асивани ваахан.
эњуэчи иигухэн. эси-тэнии таваӈки-ла тэи-лэ мэргэн-гулэ тэи поромбани
хаолиа～ исихани. тэи поромбани исихан-тании чадо-ла ундииси
э～ӈ наи-ла биэ ундэ хао-даа бии гурумбэ-дээ отоливаси-а,
сэлэвэ дуктэичи-ус, хаива дуктэичи-ус, кузнецсэл хамачаасал.
чаа～ӈ чааӈ дуктээ тэи гурундулэ энээ ундэ.
эси-тэнии тэи амбааӈгони-даа тоохан бичини.
эси-тэнии тэи гурумбэ исиндахан тэи дуктэи гурсэлбэ.
э～си-тэнии тэи-тэнии, тэи амбааӈгони эњуэвэни-лэ дуктээл ундэ,
тэи-тэнии ундииси э～ тэи-тэнии мэргэн-тэнии туи,
таваӈки энэхэн энэхэн боа, дуэвэ исихан, хаоси-даада энэвэси.
хаал хаал осихани-гоани. наа боа дуэвэни.
маӈбо-мања-о～с хаоси бии, тэвэксэ-мања-ос,
наава-даа ичэвэси моова-даа ичэвэси хамачаа-даа абаа.
тэи энэхэни боа-рагдал биини.
тэи суигуэкээн-мээ биидуэни чадо-ла хаихани, апсиндаа～
''уи даалз̌икосо, ваарии осини вааз̌аа-ма.''
чадо апсинда тэиндэ ундэ, мэргэн-гулэ.
эси, хаал хаал осихани-гоани, хаоси-даа энэгуjи кусуӈгуjи-дээ баараси.
туи таидоани ундииси э～ тэи-дээ, тэи, наи дуктэхэни-лэ наи,
гэмуригдэ абанаини ундииси исиндахани. ''гээ, тэиндииси,
мии-дээ тэимбури. эси-кээ њаа～р симбиэ сиагоjи.''
горолаа～ апсиӈкини тэи. тэи-тэнии, эњуэни-тэнии кэрмээхэн бичини.
эмз̌иэ з̌эриндуэни-мања осиогоини. порондо эњуэку-дэ.
''эси симбиэ сиагоjи тэимбури,'' ундии, ''њаар-да.'' апсиӈкини.
мэргэн-гулэ туи аора ундэ чадо, ''уи даалз̌икосо,
сиарии осини сиаз̌аа-ма.'' туи аориидоани-ла,
эм гасакаан-гола з̌идэ ундэ, хаиjаз̌и исиндахани-ос,
тээ～ пэгилэ з̌акпала энэидуэни, аориилаjи-тол пуикухэни, оjаачиани.
моӈгондо дэӈ дэӈ наамаӈкини, пуикуиз̌ииjи гэсэ тэи-лэ таванки-ла
уиси дэгдэгухэн тэи гаса. ''ии, ичэиси-э. чаачи бии мэргэусэлбэ～
тэргуэсэлбэ, хамачаании-даа хэм хории.
хооњаа энэхэн-дээ мии хуктэjи илхимби хаӈгиачиани-каа энээсиси,''
ундиини. э～ӈ туи гааз̌охан тэи гасакаан-гола њоамбани тэи маӈбола
туи даогоми туи-дээ, дэгдэгухэн бичин.
намо-ос, маӈбо-ос, даоми-даа дааваси, горо. туи энэми～ энэми
маӈбо, эм хаичи～ энэхэни. эм боачи исигохани хурээкээн биэ ундэ.
маӈбокаан... оникаан-ос, маӈбокаан-ос, даадоани, хурээкээн.
тэи порондоани-ла-даа эм з̌оокаан бичин лэу-дэ даилаани з̌оокаан.
эӈ тэи тулиэдуэни тоороко～ туигэку бичин, тала～, доогохани тэи гасакаан. эӈ
доогохани ундииси, бэjэjи-лэ, доогораа туиӈкухэни эм пуз̌ин осиогохани.
''э～ӈ гээ, анда мэргэн иируу,'' ундиини, ''з̌оокчи.''
гээ таоси иихэн эси-тэнии ундииси, мэргэн-гулэ ичэини-лэ
тэи пуз̌ин-гулэ ундииси, баи биэси, пуз̌иӈ-кээ биэси, самаа-м ичэхэни.
тулиэдуэни-дээ туигэку тоороко бичини.
э～н эси-тэнии тэи пуз̌ин-тэнии сиагоани пуjуучихэ～н,
мэргэмбэ-дээ сиавааӈкин, мэнэ-дээ сиахаал. эси-тэнии мэргэн-гулэ чадо,
аоӈгии-гоани тэи з̌оогдо. тэи пуз̌имбэ асигоjи баахан.
баариичи-даа тургэн асигоари. э～ӈ туи тараа-ла тэи-лэ пуз̌ин-гулэ хаихани,
эм хадолта～ бичин туи тараа ундиини-гоани, ''анда мэргэ～н ундииси,
тулиэ хаи, баигоаси исидала биури,'' ундии,
''мии, баигоамбаси баачиндагоjава,'' ундиини.
эси-тэнии ундииси пуз̌ин-гулэ ундииси з̌уэ инз̌увэ
ангохани. хаидоjи,
голз̌омби илгамохани. э～ӈ сисима... хаиjа～
киргиан буучуэн бии пуз̌инду, такорамз̌ини.
''гээ киргиан буучуэн,'' ундиини-гоани, ''улээн ичэз̌эхээри-э''-м-дэ.
''мээн дуруӈгуjи аӈгохамби-тании, мэнэ голз̌ондоjи нээхэн.
эмз̌иэлэ-тэнии, тэи амбааӈгони инз̌эгуэни аӈгохамби илгамохан.
тоа～с иваӈкин-гоани тэи тавава хэм-дэ. туи тараа улээн ичэз̌эхээрсу,''
ундии, ''эи-лэ. эи, мии пуjэвэ баахамби осини
лур сээксэ хэjэпсиӈкин осини, з̌апагораа хаӈгиси нээкухээрсу,'' ундиини.
туи тараа тэи, хаичи ундиини-гоани, киргиан буучуэӈгучиjи-дээ,
''улээн ичэз̌эхээри,'' ундиини-гоани. ''улээн ичэз̌эруу,'' ундии,
''пуjэвэ баахан осини-тол, хаӈгиси нээкурээ окчичихаари,'' ундиини-гоани,
мээпи. ''а тэи, амбаандола, агбиндии осини-тании,
сээксэ хэjэи осини-тании, туи биилэни, тава баароани
упэ анараа маси иваӈгохаари,'' ундиини.
эси-тэнии тэи киргиан буучуэнз̌и тэи мэргэнз̌и-лэ туи ичэндэсуэл ундэ
этуурэл ундэ чава-ла тэи пуз̌ин энухэни хамиалани.
э～ӈ туи тами-а-ла ичэини-лэ тэи, пуз̌ин инз̌улэни-лэ ундииси,
гиариикаа～н сээксэ лээлээлээлэ хэjэпсиӈкин.
киргиан буучуэн з̌апагоиз̌иjи гэсэ, э～ӈ хаӈгиси нээкуиз̌иjи гэсэ
хамачааз̌и-гдал мододахан-ос, хаиз̌и-гдал эрдэлэхэн-ус.
э～ӈ ундииси туи тараа, туи ичэз̌ээл ундэ тэи-тэнии,
тэи-тэнии амбааӈголани-тании ундииси, э～ӈ хаи,
тэӈ сахарин сээксэ луэ～п луэп туулсилухэни.
эӈ чава-ла ундииси туи биилэни, тавачи куп анаиз̌иjи гэсэ, ундииси
оjалани тиас иваӈгохачи. э～ӈ ундиини-гоани, тэи киргиан буучуэн,
''эз̌эн пуз̌ин, пуjэвэ бааха～н,'' ундиини-гоани, ''аjа,'' ундии,
''њаӈга баахани, њаӈга пуjэвэ баахани,'' ундиини.
эси-тэнии туи тараа туи чадо бии-гоани.
туи тапи-о～ пуз̌ин исиндагохан маӈгалахан, хаилараа-гоани.
э～ӈ эси з̌из̌ухэ～н сиахан хаихан пуз̌ин-тэнии эси-тэнии туи биэ ундэ,
пуз̌ин, тэи саман наини-гоани. тэи њоамбани гааз̌охан, гасакаан.
мэргэн хамачаа-даа эрдэн анаани-тании. чадо биини.
тэи инз̌увэ этууми бичини. э～ӈ ундииси туи тараа-ла, хаихани,
тэи пуз̌ин-тэнии～ эси-тэнии энусиини-о～с хаоси биини-о～с аоми～ осихан.
аондо осихан тэи пуз̌ин-гулэ ундииси туи биэ ундэ.
эӈ туи тами-а～ тэи-лэ эм модан-гола тэи киргиан буучуэн ундиини-гоани,
тэи, мэргэнчи, ''агаа～ ундииси-э, хаими туи бииси-э,'' ундиини,
''эз̌эн пуз̌ин элээ будии-jэ,'' ундиини.
''э～ӈ наи, кааламба буувури-м
гэлэини,'' ундиини, ''чава бааори, бааори,'' ундиини-гоани тэи,
киргиан буучуэн. ''эвэӈки дуиси тоовори,'' ундии, ''эи, пос-да.
надан њаромба даории～ таjаалани-тании, эм хурээкээн бии,'' ундии,
''нуучикуэкээн. тэи тэхэдуэни-тэнии, пиагдан бии,'' ундии,
''коӈгоктоз̌и, чимчиктэӈгэ～. толиз̌и хабдатаӈга з̌эргэз̌иэни бии.
тэи чимчиктэвэни сиарии-тании гуэрмэ токса сиариини,'' ундии,
''тэи-тэнии, дэрэгбэчэ... дэрэгбэни ачапчи дэхии коӈгокто,
солимбани ачапчи соси коӈгокто-даа,'' ундиини. ''эӈ чава гэлэини,''
ундиини-гоани, ''эз̌эн пуз̌ин, каалагоjи.''
э～ӈ эси-тэнии мэргэн-гулэ туи ундииз̌иэни гэсэ ундииси эси-тэнии,
хаихани. баараз̌игохани ундииси эси-тэнии ундииси тэи-лэ,
хаилараа тооми дэруухэни. дуиси тоохани. туи тоории～ тоории,
надам њаромба даохани туи энэхэн энэхэн, хуjун хурээмбэ хуэлихэн
таjаалани-тании эм нуучикуукээн хурээкээн бичин,
тэи тэхэдуэни-тэнии тэз̌э-дээ бичини эм пиагдан, чимчиктэни осини,
коӈгокто даилаани, хабдатани осини толи даилаани-да.
тэи чимчиктэвэни сиами-а～ биэ ундэ, хаи, гормахон. гормахон,
гуэрмэ токса ундиичи. тэи-тэнии ундииси э～ӈ дэрэгбэч...
дэрэгбэни ачапчи дэхии коӈгокто, солимба ачапчи соси коӈгокто
биэ ундэ. эуси jуррр таоси jур сиара ундэ.
э～ӈ мэргэн-гулэ бэичими энэлухэн ундииси, эӈ дуин даа, хаи,
осиини-ла лэӈтэк ичэхэни. ''гээ～ ундии сээнуэ уз̌ихэни сээнуэ мэргэн
ундииси, симбиэ-лэ кэтээлээ бэjэjи з̌аповааӈкимби,'' ундиини.
''мии-лэ ундииси хомбачи бии гурумбэ-лэ ундииси,
э～ӈ з̌оогдоjи хисаӈгоини саарамби, уикэjи ниэриивэ-дээ саарамби,''
ундии, ''тэӈ увуи мэргээ-рэгдээ тэи, эи њароӈгоjи кираавани исихамбани
саарамби,'' ундиини. ''симбиэ-мээ бааохан,'' ундии, ''мээндуjи...
мээпи з̌ападала-даа эчиэ саараjа,'' ундиини-гоани.
''э～ӈ эси мии эи, мооӈгоjи хуjун модан кээндэлиидуjэ з̌апааси осини,
асиси будэрэ,'' ундиини-гоани. туи ундииз̌иjи гэсэ ундээси-э,
кээндэлилухэн тэи-тэнии, туи кээндэлиэ ундэ туи хуjун модан кээндэлии
уиси хоар дэгдэгуидуэни-лэ, тэи хаи, хээjи-лэ наӈгалахани уиси.
наӈгалаини-ла з̌акпалани тээсум туугухэн тэи-лэ
куил куи～л хочиахан бичин тэи гормахоӈгони. э～ӈ тэи-лэ ундииси-э,
чава-даа ээвугуjи баргичиидоани киргиан буучуэӈгуни агбиӈгохани.
''агаа,'' ундии, ''мии гааз̌оамби,'' ундии, ''ниэвэ.
сии эугуидуэси мии, пуjууми-дээ хоз̌из̌аамби ундииси,
эугуидуjи-кээ, сээӈкурэвэ з̌апахаари,'' ундиини.
''сээӈкурэвэ з̌апахаари,'' ундиини-гоани пооӈкигоари.
эси-тэнии туи ундииз̌иjи гэсэ чилуктэ абанагохан тэи,
киргиан буучуэӈгуни пиналагоми-да. эӈ мэргэн таваӈки эугуи-гоани.
э～ӈ тэи, эугуми-лэ сээӈкурэвэ-лэ ундииси, хаи, улээмбэни～
дарами хабдатакони, эм хаидо з̌апахани.
амбаан эгз̌ивэ з̌апахан-тании хаинаа, туи тараа таваӈки эугуи-гоани.
э～ӈ исигохани. э～ӈ асини-ла абаа бичин тэи пуз̌ин-гулэ
чуӈну абаа бичин ууӈз̌ихэни ундии, элэ-дэ пуjуучихэни,
суудур хаабогоини бичин тэи, киргиан буучуэӈгуни,
тэи мэргэн исигоидоани. ''э～ӈ эз̌эн пуз̌ин хаихан,'' ундиини,
''ууӈз̌ихэни,'' ундии, ''доркимба.'' э～ӈ туи тараа ундииси энухэн
туи тапи-о～ дур дур дур дур з̌из̌ухэн
палаандола агбиӈгохани ундииси
эси-тэнии ундииси э～ӈ туи мээпи-э～ хаз̌оӈгоjи,
хаз̌омби ачоктагохани ундииси, э～ӈ туи тараа ундииси апсиӈгои-гоани.
сиксэгухэн сиахан хаихан ундииси, апсиӈгохан чимии, асини ундии,
''анда～,'' пуз̌ин ундииси, ''эси долбо, хэдундии-дээ эз̌и боачи ниэрэ,'' ундии,
''каока аохаари-а''-м-да. э～ӈ долбо сэнэхэни хэрэ～ тулиэдуэни-лэ
коӈгаралдалда кутэрэлдэлдэ таа ундэ. хаилоо пуксин тоӈгалахани.
э～ мэргэн-гулэ, ''хэр соктаjи бии-гоани боала, хуэдэхэн-ус
хоони тахан-ос,'' тээичэхэни. асини-ла, ''мии хаи уӈкэjэ,''
уӈкини. э～ӈ ундииси туи тараа апсиӈгохани хэмэ-дэ. тотараа чимии тээхэн
сэнэхэн ундииси, ''гээ ичэндэгу соктаjи хуэдэхэмби-нуу-дэ.''
эӈ мэргэн-гулэ боачи ниэхэни хэрэ～ улээмбэ боава осиогохани.
эӈ хаи хурээкээн бии тэи наи, иргэмбэ агбимбогохани бичини.
тэи асини иргэӈку-дэ. э～ӈ ундииси ундиини, ''тэи сии,
амбааӈгоси з̌идиивэни саараа, з̌аихамби,'' ундиини, ''иргэмби.''
э～ӈ туи тараа ундииси тадо мэргэн туи бии-гоани～ туи балз̌ии.
туи чадо асигоjи баараа-да. э～ӈ ундиини-гоани,
''мии-дээ мээн боачи энуми аjа～,'' ундиини-гоани.
гээ энуи-гоани мээн боачиjи, мээн боачиjи з̌из̌ухэ～н њоандоани
хаи-даа боадоани хаи-даа абаани-гоани. наи хэм сиахани
хаи бигилэи. э～ӈ туи тараа ундииси тэи з̌ооjи з̌оан даа з̌оо,
хуjун даа хурбу осиоговаандаа туи тэи эз̌и аси иргэмбэ осигои,
чадо тээгувээндээ туи биичи-гоани
горо бичэ～ з̌из̌а бичэ элээ. откоокаан.
Translation
40頭の馬
夫と妻が二人で暮らしていた。夫は朝早くから夜遅くまで狩りをして、妻は家にいて暮らしている。ある時夫がでかけた後、妻が外に出ると、一頭の馬が現れた。馬は言う、「あなたの夫の父を殺した魔物が再びやって来た。我々は40頭いたが、魔物はすでにそのうちの何頭も食べてしまった。我々を食べ尽くしたらあなた方の所へ来るだろう。だからあなた方を運んで逃げようと私は考えている。そう夫に伝えよ、」と。妻はこのことを忘れないようにと、鍋に穴をあけた。夕方夫が帰ってきて、食事の仕度をする時、鍋から水が漏ったが、妻はそれが何を意味しているのか忘れてしまった。次の日も夫はいつもどおりに山へ登った。馬が再び現れたが、男がいないので仕方なく去った。妻は忘れないようにと、今度はいつも使っている皿を割った。夫が帰ってきたが、妻はまたもなぜ皿を割ったのかを忘れてしまった。次の日夫がでかけると三度馬がやって来た。残りの馬は十頭になってしまったという。やはり男がいないので仕方なく去った。妻は忘れないようにと今度は自分の髪をバッサリと切った。夕方帰ってきた夫はそれを見て怒り、ナイフで刺して妻を殺そうとした。その時になってやっと妻は思い出した。次の朝仕度をして待っていると馬が現れた。二人が馬に乗ると魔物が現れて馬の尻尾をつかんだ。馬は飛び上がり、男は馬の尻尾をナイフで切った。魔物は大地に落ちた。馬は下流へ行き、ある川の河口に降りた。馬は力尽きてそこで死んだ。夫が木を削ると、それは小舟になり、それで対岸へ渡った。対岸には絶壁があり、そこを登り始めた。魔物が追って来た。夫は上まで登ることができたが、妻は魔物につかまった。崖の端まで行くと、そこは世界の果てだった。崖の下には雲があるばかりだった。そこで休んでいると魔物がやって来た。どこへも逃げられないことを見て、魔物も休んだ。そこへ一羽の水鳥が飛んで来て、男はその上に跳び乗った。雲だか、大河だかをずっと飛んで行くと小さな丘があり、その上に一軒の家があった。庭にはシャーマンの柱があった。水鳥はそこに舞い降りると女の姿になった。二人は食事をした。男は女を妻とした。女は二つの木の偶像を作ると、魔物と戦いに出かけた。偶像は女のものと魔物のものであった。女が言っておいたとおりに、最初に女の偶像の方から血が流れ出すと、それを別の所に置いた。次に魔物の偶像の方から血が流れ出すと、それを火に入れて燃やした。女は魔物を倒して戻って来たが、寝たきりになってしまった。男は妻を救うために出かけた。七つの沼を越えるとそこに小さな丘があり、その麓に白樺の木があった。その葉を食べに、まだら模様のウサギがやって来た。男はそれを捕まえて持ち帰った。妻に食べさせると妻は回復した。夜中に突風が吹き、次の朝起きてみると、村ができていた。その村は、魔物の襲来に備えて、女が隠していた村であった。しばらくそこに暮らした後、男はその村を率いて妻と共に自分が元いた土地へ帰った。そこに村を落ち着かせて、暮らした。終わり。