|
The bear, the tiger, and the human being
Folk tale of Udehe/(Udihe)
by Kukchinka, Nadezhda Pavlovna
Source
|
|
соӈго одо'о мафа ҙуӈэ багдиати
|
соӈго аӈи, jэу бисээ-дэ ути тигр, тигр гунээ,
одо'о мафа, соӈго, одо'о мафа ҙуӈэ багдиати.
багдими-а багдими-а аӈиӈи дианаини, соӈгоӈини,
''гээ эи баа хэгилэни, бии чоо маӈга бими.
чоо маӈга нии бими,'' гунэи. кути гунэини,
''оно маӈга нии бии сии, бии-дэ маӈга нии бими,
бии-дэ хаи маӈга бими. хаи бии маӈга биэ,'' ути кути-тэнэ дианаини,
''эи баа хэгиэлэни минтидиги маӈга нии хаи биэ.''
''нии биэ минтидиги маӈга нии-дэ анчи.''
''биэ, ҙууҙи бэгдихи буjи, ути чоо маӈга, нии.''
''гээ сии хэбуjэ утаухи минэвэ утаухи бии исэлэгэи.
jаама буjи биини ҙууҙи бэгдихи, аси маӈга.''
гээ ути аӈи, кути хэбулиэни, соӈгова.
ӈэнэити～ ӈэнээти, ули киафа. ӈэнээти～ ӈэнээти,
гээ ути кути исэи-jаҙата ҙууҙи бэгдихи буjи багдиивани.
элээ иинэлиэни ути киалани. исээни ути ҙууҙи бэгдихи буjивэ.
соӈгоӈини-дэ тээ～ти ути, ҙууҙи бэгдихи буjи, илиивэни исэи,
соӈгоӈини исэсилиэни, исэсилими-э исээни.
''ути ица'и-да, ҙууҙи бэгдихи jэу маӈга биҙэ,
ути, бии ваалинаҙами, утаҙи, вааҙаӈаи
бии утава, эмнэкчи ӈэнэвэнэҙэӈэи. ути ҙууҙи бэгдихи буjивэ.''
''гээ сии ӈэнэиҙэ, бии оло дигэнэҙэми. бии эҙэӈэи ӈэнэ,''
кути дианаини, соӈгоӈини,
гээ, ӈэнээ хокцоини, утаухи ӈэнэини, хэутими хэутими,
соӈго ӈэнэини ути, ҙууҙи бэгдихи буjитиги.
ути, ҙууҙи бэгдихи буjи, дуисиини соӈго хэутисии гунэ.
''ути, jэу гэлэми хэутиини ути соӈго,'' ааҙи исэсилиэни,
гээ, эмэини гунээ, нуантиги, нуани тэӈ тэӈ эмээ гунэ,
''гээ сии маӈга биэ бии маӈга биэ, гээ минҙуӈэ ва'алиҙафи нии маӈга,
нии маӈга.'' гээ ути ҙууҙи бэгдихи буjи гунээ,
''гээ эмэи сии бии киала-гда-ҙа ваалиҙафи минҙуӈэ,
нии маӈга, нии маӈга.'' ''сии минҙи оно галуҙаӈаи,
ицаи～ бии сии, хаи ҙууҙи бэгдихи.
эҙэӈэи галу бии синэвэ сразу вааҙаӈаи эмнэкцэ сантулаҙаӈаи,'' гунээ
''гээ эмэиҙэ. ваалинами, бии киатиги эмэи.'' эмэи-jаҙата.
илигиэни, хаи ҙулэхи гианаа, соӈгоӈини, ниитиги.
гианалиа, аӈмаjи лиаси хаанааси, ҙоонооси, хутам-да.
гээ ниитиги хокцоини. нии-да аласии-jаҙата эи ҙууҙи бэгдихи буjи,
ҙууҙи бэгдихи буjи-тэнэ ути нии биини ути, хаи, буихи, ҙаӈтахи,
гаагии-jаҙата, буиjи гаагиа, ҙаӈтаjи гаагиа, ҙуусилиэни,
эи соӈго эмэини асактигии. гээ илигиэни гунээ хэутисигэ гунээ,
аӈмаjи лиаси, тугагигааси хэутисигии хэутисигии,
''гээ сии маӈга бими гээ эмэи минтиги.''
''бии маӈга синтиги эмэҙэми.'' нии гунэини, ''гээ сии эмэи
сии маӈга нии бии, бии оду экуку аласиҙами синэвэ,''
илигээси аласии-jаҙата ҙуусими бэjэни тэӈ тэӈ ҙуусиини.
тээ да'асала эмэисини-тэнэ, гакпаи-jаҙата
ҙаӈтаjи гакпаани тиӈэни тааф, тиӈмэлэи-лиэ,
ванига тиӈмээни. ӈэнээни киатиги, будээни соӈгоӈини.
соӈгоӈини будэисини, гээ таати аӈи доолони моктои доолони,
кутиӈи дигээси илактаӈии-jаҙата,
''гээ сии минэвэ эҙи хаулиа минэвэ-кээ эҙи ваа.
бии, бии, эсими маӈгакту, ути соӈго маӈгактуини,
бии чоо маӈга нии бими, гунэини.
утааси маӈга нии гунэисини хэбуэми бии, синтиги,
бии дианаа, ҙууҙи бэгдихии, буjи, чоо маӈга,
утава эисини цэҙэ хэбуэми бии синтиги. минэвэ эҙи ваа.''
''эҙэӈэи ваа, бии синэвэ, бэлэнэjэ бии ава сииивэи. эи соӈгово
сииҙэфи. минҙуӈэ сииjэ бии синду омо дулугаафа оболоҙоми.''
''сии мэнэ дигаjа эҙи оболо.'' ''утэфи коли, сии-дээ бии,
бии-дэ бими бии ваами, гээ бии оболоҙоми синду. дулугаафа оболоҙоми.''
гээ дулугаафа оболоони, аӈи, кутиду. омо кактавани буувэ,
бэjэни-тэнэ омо кактавани гаагиани.
гээ, утиҙи аӈи, одо'о мафа лиаси агдаи-jаҙата, оболоисини.
гээ, минҙуӈэ, андамула эдэҙэӈэфи, эҙэӈэфи минҙуӈэ эҙэӈэфи ваали.
бии-дэ синэвэ гээҙи эҙэӈэи нихэ, сии-дэ минэвэ гээҙи эҙэӈэи нихэ,
гээ минти мэнэ мэнэ, хоктоӈиҙи вакцами багдиҙаӈафи,''
утэ гунэини. аӈи-тэнэ одо'о мафа, ути, ҙууҙи бэгдихи буjи дианаа,
''гээ утэ-бэдэ багдиҙаӈафи бии-дэ синэвэ эҙэӈэи вакца,
сии-дэ минэвэ эҙэӈэи вакца. мэнэ мэнэ утэ багдиҙаӈафи.''
утэ багдиати, утэ, ути одо'о мафа утэ биини, ниива-да вакца,
нии-да ути одо'о мафава-да эи вакца, утэ багдилиати,
утэ биити. эи-дэ утэ багдиити. одо'о мафа ниива эи вакца,
нии-да хаиси эи вакца одо'о мафава, утэ багдиити,
гээ ути имаӈку утэ има'асиами-бэдэ багдиити.
элээ тэуни тэтэни, умаацаи-да. короткий.
The bear, the tiger, and the human being
There once lived a bear and a tiger. The bear said he was the strongest in the world, but the tiger said there were stronger beings out there. These were the beasts with two legs, he said. The bear asked the tiger to bring it to the place where these beings were. The two went to the riverbank. The bear saw the two-legged beasts and said there was no way these small two-legged things could be strong. He went toward the two-legged beast. The tiger hid himself somewhere. The bear went toward the two-legged beast. He roared loudly. When the bear said, ‘Let’s fight to decide who is the strongest,’ the two-legged beast accepted the challenge. ‘Don’t run now, you puny two-legged thing,’ said the bear, but the two-legged beast said, ‘Just come toward me.’ The two-legged beast was actually a human. As the bear came closer and closer, the human prepared his bow and arrow, and aimed straight ahead. When the bear had come close, the human shot the arrow, and killed the bear. The tiger came out of his hiding place, and said, ‘The bear boasted he was the strongest in the world, so I brought him here. I didn’t boast, so don’t kill me.’ The human said, ‘I won’t kill you. I’ll skin this bear, and give you half the skin.’ The tiger was glad, and he took half the skin and left. The two said they would not quarrel with each other, nor do bad things to each other. They would hunt separately using each other’s paths. This is why tigers don’t attack humans, and humans don’t intentionally kill tigers. This is the way we lived.