Folk Tales

анана хаиси нии саӈта, тэлуӈуэти, анана анана-да,

anana xaisi nii saŋta, təluŋuəti, anana anana-da,

нии удиэҙигэ тала оло～ багдиати

nii udiəǰigə tala olo～ bagdiati

мэнэ мэнэ биасалафи багдии～ вакцаи～ бисити

mənə mənə biasalafi bagdii～ wakcai～ bisiti

утэ-бэдэ, тии эмнэ ути ниинтаҙига тэу вакцанаати солоихи

utə-bədə, tii əmnə uti niintaǰiga təu wakcanaati soloixi

аӈи дуихи, буjивэ ваӈнаати, аантаҙига-сэнэ эсигиэти, ҙугду,

aŋi duixi, bujiwə waŋnaati, aantaǰiga-sənə əsigiəti, ǰugdu,

адиганда аанта. гээ ути дианаити,

adiganda aanta. gəə uti dianaiti,

сэвэ нихээни гунэи-бээбу утава хаиси самаа,

səwə nixəəni gunəi-bəəbu utawa xaisi samaa,

самаа нихээни гунду утава, аӈи, кути одо'о эмэи-лиэ,

samaa nixəəni gundu utawa, aŋi, kuti odo'o əməi-liə,

ути аантаҙига биитигити, ицаи～ ҙугди бисини анана,

uti aantaǰiga biitigiti, icai～ ǰugdi bisini anana,

такой- э-бэфи ҙугди анчи бисини, ицаӈку～ ҙугди как балак,

takoj ə-bəfi ǰugdi anči bisini, icaŋku～ ǰugdi kak balak,

утэ багдиати, цуаӈху ицаӈку～, гээ кути одо'о эмэи-лиэ,

utə bagdiati, cuaŋxu icaŋku～, gəə kuti odo'o əməi-liə,

кути одо'о эмэи-лиэ～ исэи-лиэ, бэjэти боголии-лиэ, гээ оно нихэҙэӈэ,

kuti odo'o əməi-liə～ isəi-liə, bəjəti bogolii-liə, gəə ono nixəǰəŋə,

гээ ҙугди эгэлиэ хулии～ хулии-лиэ ути кути одо'о, утааси

gəə ǰugdi əgəliə xulii～ xulii-liə uti kuti odo'o, utaasi

ути ҙали хэгиҙэни кэптэи～ кэптээси, хаиси цуаӈху чуул сикпэсиду ути,

uti ǰali xəgiǰəni kəptəi～ kəptəəsi, xaisi cuaŋxu čuul sikpəsidu uti,

тэу боголиати экуку эсиктээти, ниинтаҙига элээ эмэгилиэти, баазагадигини,

təu bogoliati əkuku əsiktəəti, niintaǰiga ələə əməgiliəti, baazagadigini,

утааси суэсэфи ифи тэу кулэхиэти, цуаӈху киалани,

utaasi suəsəfi ifi təu kuləxiəti, cuaŋxu kialani,

кути одо'о нихуаналисини, цуаӈху хаилисини, цуаӈху ицаӈку～

kuti odo'o nixuanalisini, cuaŋxu xailisini, cuaŋxu icaŋku～

конечно, jоосиндэлэгэфи, суэсэҙи. хаи омо аанта jатасиани

koneshno, joosindələgəfi, suəsəǰi. xai omo aanta jatasiani

тэнэ～ jатасиани, ваагиини～ сэнэ-дэ.

tənə～ jatasiani, waagiini～ sənə-də.

гоо бисини～ ути кути одо'о, бэjэти-тэнэ имава со'усии～

goo bisini～ uti kuti odo'o, bəjəti-tənə imawa so'usii～

аӈи цуаӈху саӈалини имава со'усии, баала,

aŋi cuaŋxu saŋalini imawa so'usii, baala,

ута багдиати ути туу олоктосими дигами утэ багдиати,

uta bagdiati uti tuu oloktosimi digami utə bagdiati,

уливэ-дэ эи гаӈна, моо-да эи туэлэнэду утэ бисити.

uliwə-də əi gaŋna, moo-da əi tuələnədu utə bisiti.

утэ бими～ бими, тии эмнэ, ути кути одо'о,

utə bimi～ bimi, tii əmnə, uti kuti odo'o,

дилиҙи багбандааси сикпэсиини говорит ҙугди дуихини,

diliǰi bagbandaasi sikpəsiini govorit ǰugdi duixini,

гээ ути аанта-гда ути, топор ҙавааси,

gəə uti aanta-gda uti, topor ǰawaasi,

суэсэ ҙавааси, ӈэнэвэӈкини хуаӈдаани, ранил сиэ бааани,

suəsə ǰawaasi, ŋənəwəŋkini xuaŋdaani, ranil siə baaani,

сакиатаи-да, гээ мудаӈии, ҙали хэгилэни њаа кэптэнэгиэ

sakiatai-da, gəə mudaŋii, ǰali xəgiləni ňaa kəptənəgiə

ути кути одо'о, утэ кэптэи～ кэптэи,

uti kuti odo'o, utə kəptəi～ kəptəi,

унусэми утаду, ута-тэнэ～ бисээси, ниинтаҙига эмэктэи-лиэ,

unusəmi utadu, uta-tənə～ bisəəsi, niintaǰiga əməktəi-liə,

биасадиги, эиниктэи-лиэ, вакцанаагату.

biasadigi, əiniktəi-liə, wakcanaagatu.

гээ～ jооктосиду, ''оно jаати эи, уливэ-дэ эсити гада,

gəə～ jooktosidu, ''ono jaati əi, uliwə-də əsiti gada,

хоктоти-да анчи～, эу оно нихээти биини, ути,'' мэисиити ниинтаҙига,

xoktoti-da anči～, əu ono nixəəti biini, uti,'' məisiiti niintaǰiga,

''уливэ анана биасала гадаи эсэ биэ,'' колодец не был,

''uliwə anana biasala gadai əsə biə,'' kolodec ne byl,

биасала мулэкчилэ гадаи уливэ, jэу-дэ анчи хокто анчи,

biasala muləkčilə gadai uliwə, jəu-də anči xokto anči,

тэу имаа бул бул эсигиэни,

təu imaa bul bul əsigiəni,

''оно jактаати будэктээти,'' утаа эмэгиктэисити～,

''ono jaktaati budəktəəti,'' utaa əməgiktəisiti～,

ути, кути, аӈи зали хэгидуни ээээээээ ээини эээмусиэни, хоконоиниэ, утаду,

uti, kuti, aŋi zali xəgiduni əəəəəəəə əəini əəmusiəni, xokonoini, utadu,

ээмусиэни, гээ оно, мэнэ мэнэ гидафи ҙавагии-лиэ,

əəmusiəni, gəə ono, mənə mənə gidafi ǰawagii-liə,

гидафи ҙавагиак, хокцои-лиэ,

gidafi ǰawagiak, xokcoi-liə,

ути ваӈнами ути кути одо'ова, утаа вааати ути кути одо'ова,

uti waŋnami uti kuti odo'owa, utaa waaati uti kuti odo'owa,

гидаҙи гидасиа, эгди нии-jаҙа ниинта эгди, вааати.

gidaǰi gidasia, əgdi nii-jaǰa niinta əgdi, waaati.

гээ утэ-бэдэ аантаҙига ваагиктаати, утэ тэлуӈусидугэ ути,

gəə utə-bədə aantaǰiga waagiktaati, utə təluŋusidugə uti,

цэҙэ-эс jэу-эс, всё время тэлуӈусиду бисэ утава, утааси-тэнэ,

cəǰə-əs jəu-əs, vsjo vremja təluŋusidu bisə utawa, utaasi-tənə,

эмэктэи-лиэ ути ниинтаҙига ути кути одо'о вааи-лиэ,

əməktəi-liə uti niintaǰiga uti kuti odo'o waai-liə,

ну оно битэҙэ утэ-бэдэ всё, утэ-бэдэ тэлуӈусиду бисэ

nu ono bitəǰə utə-bədə vsjo, utə-bədə təluŋusidu bisə

анана, не знаю правда не знаю нет.

anana, ne znaju pravda ne znaju net.