|
Life in the past
Folk tale of Udehe/(Udihe)
by Kukchinka, Nina Zungovna
Source
|
|
анана удиэ саӈтанани оно багдиати
|
анана удиэ саӈтанани багдиати. оно багдиати, каванафи воои,
каваҙи бии, ҙуагиисини, эгбэнэвэ гигдээси хаиси бии утаду,
бии утаду э-бэдээ-дэ. вакцаанҙи багдиати сугҙава вакцаи
улэвэ вакцаи, улэвэ вааи эдэисини касу воои, сэутэи,
сугҙава ваами-даа хаи вагисии.
худава вакцаи туэгиисини-тэнэ. худава вакцаи,
ҙуа-да вакцаати худава аӈива, jэу бисэ-дэ ути,
ҙоотово вакцаати ҙуа, худава ҙоото, ҙоотово вааи.
ута багдиати анана удиэ саӈтанани.
ҙугдива-да эи воо бисити кавава воои ваактаҙи,
утэ-бэдэ туэгии, ҙуагиисини-тэнэ эгбэнэҙи багдии.
ута багдиати вакцаанҙи. оно вакцаати
миаусати-даа анчи бисини. гакпаанҙи ҙаӈтаҙи гакпасинҙи, гидаҙи,
соӈгово гидаҙи гидаи, нактава-да гидаҙи гидаи, утэ-бэдэ вакцаати.
сугҙава-тэнэ мэимэҙи аккинҙи, адилити-да анчи бисини,
мэимэҙи аккисинҙи вакцаати, давава, ҙауӈава ҙэли.
утэ-бэдэ багдиати саӈта, анана удиэ саӈтанани.
улэвэ вааи дигаи, сугҙава вааи дигаи, jэу jэу-дэ анчи бисини,
илэ jэу-дэ анчи бисини, саӈта анана удиэ саӈтана
утэ-бэдэ багдиати. утэ багдими-а багдими-а
луса колиҙини эдээ-тэнэ аjа багдилиати.
ҙугдинафи-даа воои. њаулаҙига-да њаансулалии, анана эсити њаансула
удиэ ситэнэни. эсити-дэ саа њаансулава-даа эсити саа.
эми-дэ њаансула ута багдиати. удиэ саӈтанани.
бии абугаjи-да бисээ, эниӈэjи-дэ ицаадиги нодооми
абугаjи-тэнэ ҙаа сээли нодооми, ҙаа сээ бисими,
бии абугаjи анчи эдэисини, эниӈэjи-тэнэ омо сээ хулэми бисими.
эниӈэjи будээ аӈаҙа багдиами бии.
ута багдии, бии суусуjи, сэниӈэнэ игисиэти минэвэ ицаадиги.
њаансулаами хаиси. нада клас-а-ва мутээми.
нада клас-ава мутээнҙи ленинграда-ла њаансуланаҙаӈаи бисими.
ваалилисити эсими-дээ ӈэнэ такой, эсими-дэ њаансуланаса.
этэтэлиэми аӈи, мичиостанци-ла этэтэи.
мичиостанци-диги арми-тиги ҙаваати, арми-ду служила.
арми-диги эмэгиэми, этэтэлиэми госпромхоза-ла этэтэи. вакцаи.
бии-дэ хаи вакцаами. баа хоотигини. худава вааи,
олондо ҙуа-тэнэ, олондо галактаи, август-а сентябль-а биалани.
олондово-да ҙаваи бисэи. худава ҙавами, олондово-да ҙаваи,
аӈива давава-да давамаи бисэ мафамула, аанаҙи, аккисии боло.
маала воои, нэмиктэ воои, вагисии.
буjивэ вааи эдэисини хаи ута касуӈисии дэгуму воои,
утэ-бэдэ багдиаму. нактава-даа вааи бисэу.
соӈгово-да вааи бисэу, киаӈа иjэвэни-дэ ваами вакцаи ҙуа.
маj биала вакцалиу бисэ, май биалани вакцалиу. киаӈава,
иjэвэни-тэнэ. аӈи, ҙиктэвэ ҙуа, август-а биалани ҙиктэвэ таии.
утэ-бэдэ багдиати. буу-дэ утэ-бэдэ багдилиаму,
анана утэ-бэдэ эсити багди～ анана jэу-дэ эсити нихэ,
мэнди～ этэтээти, дигалаафи-тэнэ,
мээн дигалаафи вакцаи, мээн дигалаафи бутаи,
гэгбэӈкувэ-дэ хаи мээн дигалаафи таии.
jэу буjивэ вааӈдами мээнҙи вааи, сугҙава вааӈдами мээнҙи вааи,
бутами бисити. тэу дигалаафи бутагии
боло дигалаафи бутаи ута багдиити анана саӈта,
удиэ саӈтанани. эи-тэнэ луса колиҙини багдилиати. удиэ ситэнэни.
jэу дианаҙами больше, нечего говорить уже,
удиэ саӈтаҙига багдиамати. утэ тэлуӈусиэми,
эи удиэ саӈтанани анчи эдээти малактаити～ њаулаҙига,
луса колиҙини-мэи багдилиати.
луса кэjэвэни њаансулаи лусамаҙи-мэи дианаи,
удиэ кэjэвэни-дээ эи-дээ эгҙэ эдээти.
эи, удиэ саӈтанани тэу малактаати.
фронт-аду, немеце-ҙи ваалими тэу фронт-аду будэи,
эмэгиэгэту саӈтаҙига тэу будээти, малактаини саӈта.
оду вацаа эсигиэни саӈта. њаула-мэи эсигиэти,
њаула удиэ кэjэвэни-дэ эи эгҙэ, лусамаҙи,
луса гиаҙи-мэи багдиити эи хэӈкини, удиэ њауланани,
мэнэ кэjэфи эити эгҙэ эдээти.
туу туу багдиити њаансулаа луса,
луса кэjэвэни њаансулаи удиэ кэjэвэни-дээ эити-дээ њаансула.
туу багдиити. элээ утэ-бэдэ багдиҙаӈати
тэлуӈулэ эдэҙэӈэти. туу багдиати.
эи њаула утэ-бэдэ багдиати. всё.
Life in the past
The Udehe in the past used to live in built huts, and in the summer in pitched tents. They fished, made the flesh of beasts into dried meat or smoked it. They caught fur-skinned beasts in winter, but caught otters in summer also. Hunting was always done by bow and arrow. With bears you would pierce them with spears; with fish you would pierce them with harpoons. They caught salmon, ciscoes, イトウs and other fish. When we came under Russian rule, live was much better. Children also started studying. My father abandoned my mother and myself when I was ten. My mother died after a year. My uncle and my aunt brought me up. I was supposed to go to Leningrad to study, but I couldn’t because of the war. I worked at a ship moorage, and then worked in the army. After coming back from the army, I also worked for a state-operated harvesting firm. After that, I went back to hunting. In the summer we would gather ginseng — the two of us, my husband and I. We would fish for salmon as well. We also hunted for boars, bears, and soft antlers of red deer. In August we would gather Blackberry and made a living that way. In the past we used to work for our own food. In autumn, we used to store up food for winter. Nowadays, the Udehe elders are gone. The young people live only in the Russian way. They only use Russian; they can’t understand the Udehe language. Soon the past way of life will be just a story.